நமதான இறுதிச்சொல்:
ஒவ்வொரு முறையும்
கடைசிச் சொல்லின் போது
இருவருமே அழுகிறோம்
நம் வாழ்க்கை
நம் தேடல்
நம் துரோகம்
என அனைத்தின் பிம்பமாகவும்
இருக்கிறது
அது
இருள் களைந்து எழுகிற
பகலைப்போல
காமம் களைந்து எழுகிற போது
இன்னொரு சொல்லை
எறிந்து விட்டுப் போகிறாய்
அது
முதற்சொல்லாயினும்
கடைச்சொல்லாகவே
தொனிக்கிறது
ஒவ்வொரு நாளும்
நான்
வேண்டிக்கொள்வது
ஒன்றே
இன்றேனும்
ஒரு இறுதிச்சொல்லை
நீயோ
நானோ
உதிர்க்காமல் இருப்போம்
அதுவே
இறுதியென்று நாம் அறிந்திருந்தாலும் கூட!
- மணிவண்ணன்.
