காவல் நாய் -கார்த்திக் நேத்தா

அந்தக்  காவல் நாய்
என்னைப் பார்க்கிறது

ஐஸ் சப்பும் சிறுமியை
பார்க்கும் கிழவனைப் போல .

பேச ஆளில்லாத
நோயாளியின் கண்களை
அந்த நாயின் கண்கள் பிரதிபலிக்கிறது .



பயணத்தின் தூரத்தை எண்ணி
சலிப்பு கொள்ளும் மூதாட்டியின்
மனநிலையில் அது நின்று கொண்டிருக்கிறது .


இறக்கப் போவதை உணர்ந்த
ஒருவனின் சிரிப்பை
அந்த நாயின் முக நெளிவுகளில்
நான் பார்த்துக் கொண்டிருக்கிறேன் .


இறுகிக் கிடக்கும்
மனதிற்கு சாட்சியாக நிற்கிறது .

பஞ்சரான சைக்கிளை
ஓட்டிக்  கொண்டு போவது போல
அதன் கண்கள் எதையோ
கண்டு கொண்டிருக்கிறது .

எந்தக் குழந்தையும்
அந்த நாய்க்கு
டாட்டா காட்டவில்லை .

ஒரு துணையாக
எந்த பைத்தியமும்
அதன் அருகில் இல்லை .


முகாமுக்கு போக விரும்பாத
அகதியை பார்ப்பது போல
அந்த நாயைப்
பார்த்துக் கொண்டிருக்கிறேன்

அந்தக் காவல் நாய்
என்னைப் பார்த்துக் கொண்டிருக்கிறது
என் வாழ்க்கை என்னைப்
பார்த்துக் கொண்டிருப்பது போல

கார்த்திக் நேத்தா.