புத்தமரம் - கார்த்திக் நேத்தா

வீழும் இலை
குளத்திற்கு மாட்டி விடுகிறது
வளையல்.

நீரின் சலனம் கேட்டு
துணுக்குறுவதில்லை  பறவைகள் ,
த்யானானுபவம் அடைகின்றன.


கறுப்பாகிக் கொண்டிருக்கும்
குளத்தின் மேல் பைய ஊர்கிறது
நிலா வெளிச்சமெனும் மின்மினி உருண்டை.

தியானத்தில் இருந்ததாக பிதற்றிய புத்தன்
உண்மையில் தியானத்தில் தான் இருந்தானா ?

அரச மரம் மட்டுமே போதி மரம்
புத்தனாக இருந்தால்.

எல்லா மரங்களும் போதி மரங்களே
பறவையாக இருந்தால்.