கூழாங்கல்.. - கார்த்திக் நேத்தா

கூழாங்கல்லின் தனிமை

எனக்கு வேண்டும் .

நதிகளின் பெரும் அமைதியின்மை

நிறைந்த தனிமை அது .

குழந்தைகளின்

கனவுகளில் தொலைந்து கொண்டேயிருக்கும்

தாங்கவொண்ணா மகிழ்வு நிறைந்தது

அத்தனிமை .

எண்ணிய எண்ணியாங்கு

செய்ய விடாதது .

ஒலிகளின் சவப்பெட்டியாக

கிடக்கும் மாமனநிலையில்

அமிழ்ந்து போக பெரிதும் விரும்புகிறேன் .

பயணத்தின் போது

முட்டிக் கொண்டு வரும் மூத்திரம் ,

ஒரு கணமேனும் நம்மை நாம் மட்டும் வசிக்கும்

உலகில் வீசி எறியுமே ;

அந்தத் தனிமை எல்லாப் போதும் வாயித்தால் ,

கல்லின் தனிமை அஃதே .

பாலிதீன் பைகளில்

கூழங்கல்லை அடைத்துக் கொண்டு போகும்

உங்களை வெறுக்கிறேன் .

மலைகளின் பாட்டனை கொல்லும்

வன்கொடுமை அது .

கடலை ,

கடற்கரைக்கு சென்று கற்றுக் கொள்ளும்

உங்களுக்கு ,

கடத்தி வரப்படும்

கூழாங்கல்லின் கேவல் புரியாது .

நீரின் மரித்த கண்களை,

கூழாங்கல்லாய் அலமாரியில் வைத்து

அழகு பார்க்கிறீர்கள்.

எல்லோராலும்

அகதியான கூழாங்கல்லே ....

உனது தனிமை தான் எத்தனை

துயர் நிறைந்தது .